Loading... आजः बुधबार, माघ ७, २०७७

सन् २०२१ आन्तरिक पर्यटन वर्ष : मन्त्री भट्टराई

काठमाण्डौ । संस्कृति पर्यटन तथा नागरिक उड्डयनमन्त्री योगेश भट्टराईले सन् २०२१ आन्तरिक पर्यटन वर्ष हुने बताउनुभएको छ ।

शुक्रबार पर्यटन मन्त्रालयमा भएको अन्तर्क्रिया कार्यक्रममा बोल्दै मन्त्री भट्टराईले तत्काल विदेशी पर्यटक आउने सम्भावना नरहेकोले सन् २०२१ लाई आन्तरिक पर्यटन भ्रमण वर्षका रूपमा मनाउन तयारी गर्नुपर्ने बताउनुभएको हो । सरकारले आन्तरिक भ्रमण वर्ष भनेर घोषणा नगरे पनि सन् २०२१ हाम्रा लागि आन्तरिक पर्यटन वर्ष हुने भएकाले यसैलाई जोड दिने गरी सरकारले योजना बनाइरहेको उहाँको भनाइ छ ।

कोरोना भाइरस सङ्क्रमको जोखिम रहेको अवस्थामा विदेशी पर्यटक आइहाल्ने अवस्था नभएकोले स्वास्थ्यका मापदण्ड पूरा गरेर पर्यटन बजारलाई बढाउन उहाँले व्यवसायीहरूलालाई आग्रह गर्नु भयो ।

फरक प्रसङ्गमा मन्त्री भट्टराईले अहिले चर्चामा रहेको दुई दिन सार्वजनिक बिदा दिने अवधारणा सही रहेको दाबी गर्नुभएको छ । यसभन्दा अघि लागू भइ असफल भएको चर्चा समय परिस्थितिअनुसार अहिले सही हुने भन्दै लागू गर्न सकिने उहाँले बताउनुभयो ।

कर्मचारीलगायत सबैमा दुई दिनको बिदाले पुनर्ताजगी बनाउने र आन्तरिक पर्यटन समेतलाई टेवा दिन सक्ने भएकोले सरकारले अगाडि सारेको दुई दिन सार्वजनिक बिदा दिने निर्णय सही हुन सक्ने पनि मन्त्री भट्टराईले बताउनुभयो ।

कार्यक्रममा मन्त्रालयका पर्यटन बोर्डका प्रमुख कार्यकारी डाक्टर धनञ्जय रेग्मी, होटल एसोसिएशन नेपालकी अध्यक्ष सिर्जना राणा र मन्त्रालयका अधिकृत रचना प्रधानले कोभिडले नेपाली पर्यटन र अर्थ व्यवस्थामा परेको प्रभावबारे कार्यपत्र प्रस्तुत गर्नुभएको थियो ।


ताजा समाचार