टेलिफोन नहुँदा स्थानीयवासीलाई सास्ती

visionkhabar
प्रकाशित मितिः बुधबार, पुस ४, २०७५  || 115 Views   ||   |  

जुम्ला । तीन गाउँपालिका रहेको सिंजा क्षेत्रमा अझै टेलिफोन सेवा पुग्न सकेको छैन । टेलिफोन सेवा उपलब्ध नहुँदा सिंजावासीलाई सास्ती भएको छ ।

सिंजा गाउँपालिकामा नेपाल टेलिकमको साझेदारीमा टेलिफोन विस्तार भएको भए पनि अन्य गाउँपालिकामा भने डाँडा पाखा धाउनुपर्ने बाध्यता रहेको छ । गाउँपालिकाको पहल तथा समन्वयमा नेपाल टेलिकमले ‘टु जी’ सेवा विस्तार गरेको हो । टेलिफोन सेवा विस्तार भएपछि त्यहाँको सिंजा, हिमा र कनकासुन्दरी गाउँपालिकाका वासिन्दा लाभान्वित भएका छन् ।

गत वर्षको स्थानीय तहको चुनावमा आफूले जनतामा गरेको बाचाअनुसार नै टेलिफोन सेवा विस्तार गरेको गाउँपालिकाका अध्यक्ष देवलसिंह रावलले बताउनुभयो । टेलिफोन नभएका कारण यहाँ सम्पन्न भएका स्थानीय तह, प्रदेश र प्रतिनिधिसभाको निर्वाचनमा निकै ठूलो कठिनाइ भएको छ ।

मत परिणामसमेत प्रहरीको सेटमार्फत सूचना लिनुपर्ने बाध्यता अब सिंजाको लागि हटेको अध्यक्ष रावलले जानकारी दिनुभयो । सिंजाको नराकोटमा राखिएको टेलिफोन टावर हवाई कम्पनीले निर्माण सम्पन्न भइसकेको छ । यो समय सिंजाली पुरुष धन कमाउन भारततिर गएपछि आफन्तसँग नियमित सम्पर्कसमेत हुन सकेको छैन । अहिले त्यहाँका महिला, पुरुषसँग कुराकानी गर्न नपाएको कनका सुन्दरी गाउँपालिका–५ का लालकली बूढाले बताउनुभयो ।

श्रीमान् भारत गएको महीना पुग्न लाग्यो, टेलिफोन नहुँदा सास्ती भएको छ, उहाँले भन्नुभयो । यहाँका हरेक बस्तीका पुरुष व्यापार व्यवसायको लागि भारततिर गएका छन् । स्थानीय तहले सञ्चारको लागि करोडौँ रकम छुट्याएका छन् । टेलिफोन विस्तारको लागि भने स्थानीय तहले अझै सक्रियता देखाउन सकेको छैनन् । रासस